Modnen barnehage skal vera ein lærande organisasjon, ein arena for utvikling og endring, med bygging av kunnskap og kompetanse, både for born og vaksne.

Leiken er barnet sin viktigaste læringsarena. I leiken øver og utviklar barnet kompetansen sin på alle område, både fagleg og sosialt. Difor har leiken i seg sjølv ein eigenverdi som me vil verna om. Me vil at kvardag i Modnen barnehage skal vera prega av varme og omsorg, glede og humor. Me vil ha ein strukturert kvardag, med trygge rammer og tydleg grensesetting.

Me skal arbeida for eit inkluderande fellesskap prega av respekt og likeverd, der alle born og vaksne skal verta sett og høyrd, og der mangfald er ein ressurs. Dei vaksne sitt syn på born er heilt grunnleggjande for å nå dette målet. Korleis snakkar me til og om born? Korleis er kroppsspråket vårt? Kvar har me fokuset vårt i samværet med borna? Kva tenkjer me om born?

I personalet si kompetanseheving dette barnehageåret, vil dette vera eit gjennomgåande tema.

Me satsar på digitale verktøy og sosial kompetanse.

Barndomen og leiken skal ha ein sentral plass i barnehagekvardagen, og både barndom og leik har ein eigenverdi i seg sjølv som skal anerkjennast. Me skal i barnehagen gje dagleg gode vilkår for leik og vennskap. Alle barn i barnehagen skal oppleva vennskap, glede, humor, spenning og engasjement gjennom leik – åleine og i fellesskap med andre. Barnehagekvardagen må vera prega av gode kjenslemessige opplevingar.

For å fremja danning skal barnehagen mellom anna oppmuntre borna til å vera prøvande og nysgjerrige på omverda og bidra til å leggja grunnlaget for modning, og sjølvstendig og ansvarleg deltaking i eit demokratisk fellesskap. Arbeidet i barnehagen skal fremja samhald og solidaritet, og barnehagen skal bidra til at borna kan få ei gryande forståing for felles verdiar og normer som er viktige for fellesskapen.

Den digitale praksisen i barnehagen skal bidra til leik, kreativitet og læring. Digitale verktøy skal brukast med omhug og ikkje dominera som arbeidsmåte. Ved bruk av digitale verktøy i barnehagen skal dette støtta opp om borna sine læreprosessar og bidra til eit rikt og allsidig læringsmiljø for alle born. Borna skal og få ei gryande forståing for digitale medium. Dette er og nedfelt i rammeplanen.

Modnen barnehage ynskjer å skapa eit inkluderande miljø. Målsetjinga deira er: Modnen barnehage har nulltoleranse mot mobbing. Me vil ha eit respektfullt og inkluderande miljø der alle barn skal kjenne seg trygge og verte godt ivaretekne på alle måtar.