Mellom Normannslågen og Kvenna

Fjellstyret meiner området mellom Nordmannslågenvassdraget og Kvenna er sentralt i reinens moglegheit til vandring aust – vest. Aktivitet i dette området kan redusera reinens moglegheit til vandring. Området er eit attraktivt område for friluftsliv, spesielt sportsfiske. Det er mange tjørn og vatn i området og nokre område er meir attraktive enn andre. Dette har medført stor menneskeleg aktivitet i tradisjonelle trekkområde.

Tilrettelegga for mindre uro 

Den sentrale DNT-løypa mellom Besso og Litlos går og gjennom området. I reinsjakta har det frå Ullensvang og Eidfjord vore innført jaktfri sone i området. Erfaringane er at jaktfri sone har bidrege til at villreinen i jakta trekkjer meir vestover på rette vindretninga.

Situasjonen med cwd-smitte på Hardangervidda gjer det viktig å leggja til rette forjakt på eldre bukk. No med låg bukkeandel i stamma er det utfordrande for jegerane å fella bukk. Uroing av flokkane under jakta gjer at flokkane går tett og bukken er vanskeleg å fella. Reinen ser ikkje forskjell om det er ein fotvandrar, sportsfiskar eller jeger den møter.

Eidfjord fjellstyre har fatta slikt vedtak:

Med heimel i fjellova § 30 fredar fjellstyret området sør for Nordmannslågenvassdraget i Eidfjord statsallmenning for fiske med stong og handsnøre i tida 15.08-01.10.

Fjellstyret har i prosessen fram mot dette vedtaket hatt kontakt med Miljødirektoratet (ref. 2024/6330) og varsla Ullensvang fjellstyre. Fjellstyret har fått tilslutning frå Eidfjord kommune og villreinnemnda for Hardangervidda til vedtaket.

I samsvar med fjellova, § 30, 3.dje lekken, gjer fjellstyret dette kjent i dette brevet og som og vert kunngjort på heimesider.