Eidfjord kommune og NVE har planlagt eit tiltak for å sikra bygningar og infrastruktur på Lægreidsflata mot flaum. Prosjektet skal no gjennomførast. Anbodsprosessen er avslutta, og R. Nielsen Entreprenør AS har fått kontrakten.

Kven har ansvar for prosjektet?

Eidfjord kommune er byggherre og tiltakshavar for prosjektet. NVE gjev økonomisk støtte og har vore med i planlegginga. Norconsult Norge AS har vore rådgivar i planleggingsfasen og skal vera byggjeleiar under gjennomføringa.

Oppstart av arbeidet

Entreprenøren har formell oppstart 12. oktober 2026. Det vert ikkje arbeid i sjølve anleggsområdet denne dagen. I første omgang skal entreprenøren utføra førebuande arbeid og etablera riggområdet.

Riggområde i Vikehagen

Riggområdet vert etablert i Vikehagen på eigedomen gnr. 4 bnr. 110. Tilkomsten til området kjem frå sør, nærast det kommunaltekniske området. Brakkeriggen vert plassert aust på området for å skjerma bustadområdet mot aktivitet i riggområdet.

Meir informasjon etter oppstartsmøtet

Eidfjord kommune, NVE, Norconsult og entreprenøren skal ha oppstartsmøte 16. oktober 2026. Etter møtet publiserer me meir informasjon om oppstart, gjennomføring og framdrift.

Prosjektet skal redusera risikoen for flaumskadar på bygningar og infrastruktur. Arbeidet skal gå frå rv. 7 ved fjorden, gjennom Vikedalen og vidare til Lægreidsflatane ved Esmarhaug.

Prosjektet omfattar:

• bygging av 220 meter flaumvernmur i betong på Lægreidsflatane
• tilpassing av terrenget for å sikra god avrenning av overvatn på Lægreidsflatane
• bygging av om lag 110 meter overvasskanal med plastring på Lægreidsflatane
• bygging av om lag 25 meter prefabrikkert betongkulvert med inntak for overvatn under kommunal veg på Lægreidsflatane
• omlegging og oppattbygging av om lag 180 meter kommunal veg med betongmurar på Lægreidsflatane
• bygging og oppattbygging av om lag 230 meter gangveg med betongmurar på Lægreidsflatane
• bygging av om lag 80 meter tørrsteinsmura overvasskanal frå Lægreidsflatane til Vikedalen
• bygging av om lag 120 meter plastra overvasskanal i Vikedalen
• bygging av om lag 50 meter prefabrikkert betongkulvert med plasstøypt inntak for overvatn ved bustadene langs rv. 7 og under rv. 7

Aktørar i prosjektet

• Eidfjord kommune er byggherre og tiltakshavar.
• Norges vassdrags- og energidirektorat (NVE) bidreg med planlegging og gjennomføring av prosjektet.
• Norconsult er rådgjevar og byggjeleiar.
   

Kontaktperson

Har du spørsmål om prosjektet, kan du kontakta:

Gry Bystøl Gladheim
Eidfjord kommune
E-post: gry.gladheim@eidfjord.kommune.no