Skulen har ansvar for at alle elevar har eit trygt og godt skulemiljø. Skulen har òg ansvar å førebyggja og handtera mobbing og andre krenkingar. 

• Stortinget vedtok i mai 2017 endringar i opplæringslova for å styrkja rettane til elevar som blir krenka.
• Nulltoleranse mot mobbing, vald, diskriminering og trakassering er no lovfesta.
• Dersom ein elev meiner at han eller ho ikkje har det bra på skulen, skal rektor og andre som jobbar på skulen ta dette alvorleg.

Dei nye reglane om skulemiljø inneber ei aktivitetsplikt for skulane. Alle som jobbar på skulen skal følgja med på om elevane har eit trygt og godt skulemiljø, og dei skal gripa inn overfor mobbing og krenkingar. Dersom nokon som jobbar på skulen mistenker eller kjenner til at ein elev ikkje har det bra på skulen, skal rektor varslast. 

Skulen skal snarast mogeleg undersøkja saka, og syte for at involverte elevar blir høyrt. Skulen skal deretter setja inn eigna tiltak for å syta for at eleven får eit trygt og godt skulemiljø.
 

Dersom ein som jobbar på skulen får mistanke om, eller kjennskap til, at ein annan som jobbar på skulen utset ein elev for krenkingar, skal vedkomande straks varsla rektor. Rektor skal varsla skuleeigar.

Ta kontakt med rektor dersom barnet ditt ikkje er nøgd med skulemiljøet. 

Dersom du er misnøgd med skulen si behandling av saka, kan du venda deg til Fylkesmannen. Fylkesmannen vil kun behandla saka dersom de på førehand har teke opp saka med rektor, og det har gått minst ei veke frå saka vart teken opp med skulen.

Dersom Fylkesmannen kjem til at skulen ikkje har gjort det dei skal, kan Fylkesmannen i eit enkeltvedtak avgjera kva skulen skal gjera for å syta for at eleven får eit trygt og godt skulemiljø.