• Kommunal stønad kan gjevast til frivillige organisasjonar i Eidfjord kommune.

• Søkjar må ha tilhøyrighet til Eidfjord, organisasjonen må ha medlemmar busett i Eidfjord kommune

• Kommersielle tiltak og organisasjonar som har til oppgåve å ta seg av medlemane sine yrkes-, økonomiske- og/ eller helsemessige interesser får ikkje stønad.

• Ved annonsering skal det opplysast at tiltaket har fått tilskot. Fylgjande formulering skal nyttast: "Støtta av Eidfjord kommune"

Eksempel på område som  kan få stønad er:

• idrett og friluftsliv
• kunst og husflid
• song og musikk
• foto og dans
• andre kulturaktivitear

Målet med stønadsordninga er å stimulera til kvalitet, styrkja felleskulturen og koma flest mogeleg til gode (jfr. Stortingsmelding nr 61 ”Kultur i tiden”)

Driftsstønad kan gjevast til frivillige organisasjonar som har kulturaktivitet som hovudoppgåve og som har minst 5 betalande medlemer. Med medlem vert rekna personar som bur i Eidfjord kommune, er oppført i medlemsregister og betaler kontingent. Organisasjonar som gir pengegåve til eksterne- og/eller hovudorganisasjonar får ikkje stønad. Dette gjeld også for organisasjonar som betalar godtgjersle til styret. Godtgjersle for særs tyngjande styrearbeid kan godkjennast. Organisasjonen må driva kontinuerleg i Eidfjord kommune. Med stønad til drift meinest:

• Løpande driftsutgifter
• Utgifter til relevante kurs for styret og medlemer. ( Inntil 50 % av dokumenterte kurskostnader kan bli dekka)
• Utgifter til nødvendig planlegging
• Utgifter til oppstart av ein organisasjon. Det kan gjevast driftsstønad som oppstarttilskot . Reorganiserte organisasjonar vert rekna som nystarta når verksemda vert teken opp att etter minimum 3 år. Saman med søknaden skal det leggjast fram vedtekter og plan for bruk av stønaden.

Stønad til Driftstilskot til frivillige organisasjonar  vert utlyst årleg, og vert utlyst i pressa, på kommunen si heimeside og ved oppslag. Søknadsfrist er 15. september kvart år.

• Driftstilskot kan gjevast til grendahus i Eidfjord kommune på grunnlag av søknad. 
• Investeringstilskot  kan gjevast til grendahus i Eidfjord kommune som planlegg ei større eller mindre investering. Det må føreliggja kostnadskalkylar og detaljert budsjett for korleis investeringa vert finansiert og nytta. Løpande vedlikehald vert rekna som drift.

Det er ein føresetnad for stønad at dugnadsarbeid er del av investeringa.

Stønad til drifts- og investering tilskot vert utlyst årleg, og vert utlyst i pressa, på kommunen si heimeside og ved oppslag.

Søknadsfrist er 15. september kvart år.

Det  kan det søkjast om stønad til kulturtiltak som har kommunal eller lokal verdi og som er opne for alle. Stønad kan også søkjast av enkeltpersonar i kommunen. Døme på kulturtiltak kan vera:

• kulturarrangement
• kurs
• prosjekt. Prosjekt er tidsavgrensa aktivitet , tiltak, arrangement/arbeid som ikkje er ordinær drift av organisasjonen. Ved handsaming av stønad til prosjekt vert nyskaping, samarbeidstiltak, tiltak for barn og unge, større konsertar/teater med profesjonelle utøvarar og eller/ i samspel med desse, og integreringstiltak for medlemer med spesielle behov vektlagt.
• underskotsdekning

Søknad om stønad til kulturtiltak må vera kulturkontoret i hende i god tid før tiltaket skal setjast i gang. Søknad om kulturtiltak kan søkjast heile året, og avgjerd er delegert til administrasjonen. Dette gjeld for søknader med stønad på inntil kr 25 000. Stønad til kulturtiltak som kan søkjast heile året

Unntak:  Søknad om stønad til særs omfattande tiltak,( festivalar mv) , bør av omsyn til budsjettarbeidet fremjast seinast innan juli månad året før tiltaket skal gjennomførast.

Frivillige lag og organisasjonar som skal arrangera festivalar eller større arrangement i Eidfjord kan søkja om:

• Lån/leige av bygningar og anlegg
• Praktisk hjelp
• Lån/leige av utstyr
• Økonomisk tilskot

Tilskot til større arrangement/festivalar  vert utlyst årleg, og vert utlyst i pressa, på kommunen si heimeside og ved oppslag.

Søknadsfrist er 15. september kvart år.

MERK: Søknad om stønad til særs omfattande tiltak (festivalar mv), bør av omsyn til budsjettarbeidet fremjast seinast innan juli månad året før tiltaket skal gjennomførast.

Ved handsaming vert søknadene vurdert ut frå:

• Barn og ungdom vert prioriterte
• geografisk rekkjevidd
• aktivitetsnivå
• driftskostnader
• organisasjonen sin økonomi: kontantar/ bankinnskot/ andre verdipapir

Eventuelle kommunale tenester skal kostnadreknast etter faktisk kostnad. Dersom kommunen ikkje kan tilby omsøkte teneste, kan ein vurdera tilskot til å kjøpa desse tenestene hjå private.

 Dei som ynskjer det kan få hjelp med søknaden frå kulturavdelinga. Ta kontakt i god tid før søknadsfristen for å avtala tidspunkt på tlf 53673500/93.

Søknad om kommunal stønad skal sendast til kulturavdelinga ( Eidfjord kommune, kulturavdelinga, Simadalsvegen 1, 5783 Eidfjord) på eige skjema.  Alle naudsynte opplysningar/vedlegg må liggja ved når søknaden vert sendt.

Alle søknadene skal innehalda:

• underskriven årsmelding
• budsjett og planar for komande år
• revidert rekneskap. Rekneskap er stadfesta av revisor eller underskriven av minst to medlemer ( rekneskapsførar og ein frå styret)
• eige underskrive brev skal fylgja søknaden med skildring av kva stønad det vert søkt om

Alle søknadar skal innhehalda påkrevde vedlegg, utan desse vil søknaden ikkje bli behandla men sendt i retur. Mangelfulle søknadar vert ikkje behandla men sendt i retur for oppretting med ein frist på 14 dagar. Søknadar som er innkomen etter søknadsfristen vert ikkje handsama.

Elektronisk søknadskjema for kulturmidlar

Organisasjonar i andre kommunar får ikkje stønad.

Unntak: Dersom organisasjonen har medlemer frå Eidfjord kommune, kan søknaden vurderast. Søknaden skal grunngjevast og dokumentarast. Dersom søkjaren søkjer stønad/ har fått stønad frå andre, må dette opplysast

Formannskapet vedtek etter innstilling frå kulturkontoret. Søkjaren vert gjort kjend med vedtaket skrifteleg og utbetaling skjer når vedtak er gjort.

Unntak: Stønad til kulturtiltak er delegert til administrasjon ved søknadsum under 25.000,-

Dersom stønad  til større arrangement/festivalar medfører behov for auka budsjettramme, vert saka lagt fram i samband med økonomiplanarbeidet.

Alle vedtak om stønad til kulturarbeid er enkeltvedtak ( jfr Forvaltningslova § 2) Alle enkeltvedtak skal vera grunngjevne ( §24) og kan påklagast ( § 28 ). Eventuell klage skal sendast til Eidfjord kommune innan 3 veker etter at vedtaket er motteke.

Tilskot til kulturarbeid skal hentast frå konto 14700 (tilskot) innan desse ulike tenestene:
3800          Idrett
……          Tilskot til kulturmidlar

Eidfjord kommune har rett /plikt til å utføra kontroll med at stønadsmidlar vert brukt i tråd med vedtaket. Kommunen kan difor sjå nærmare på korleis rekneskap og drifta i organisasjonen vert utført.

Dersom søkjar har gjeve urette eller misvisande opplysningar, eller bryt med retningsliner for stønad, misser vedkomande retten til stønad i minst eitt år. Eventuelt tilskot skal betalast attende dersom ikkje arrangementet vert gjennomført.