Høyringsfrist

• Høyringsfrist for denne forskrifta er sett til 01.12.2026
• Høyringsinnspel som kjem etter det vil ikkje verta vurdert.
• Alle høyringsinnspel skal sendast til postmottak@eidfjord.kommune.no

Bakgrunn for høyringa

Ny opplæringslov (09.06.2023) legg opp til at kommunar og fylkeskommunar skal fastsetja lokale forskrifter på fleire område enn tidlegare. På nokre område er dette ei plikt, medan lova på andre område gjev kommunane høve til å fastsetja eigne lokale forskrifter. Kommunar og fylkeskommunar pliktar å sørgja for høyring, vedtak og offentleggjering av eigne lokale forskrifter i samsvar med ny opplæringslov.

Kva gjeld høyringa?

Denne høyringa gjeld forskrift om skulerute for grunnskulen i Eidfjord kommune.

Ordninga i dag

I Eidfjord kommune har praksis vore at dei konkrete skule- og feriedatoane for kvart einskilt skuleår har vore sendt på høyring og deretter vedteken av kommunestyret. Dette vart også gjort for skuleruta for skuleåret 2026/2027.

Framlegg til ny forskrift

Administrasjonen foreslår no å skilja mellom ei overordna forskrift om skulerute og den årlege skuleruta for kvart skuleår. Den lokale forskrifta skal vera generell og fastsetja dei rammene, omsyna og reglane som skal leggjast til grunn ved utarbeiding av årleg skulerute. Forskrifta vil mellom anna regulera tal skuledagar, plassering av
feriar, planleggingsdagar og andre forhold som må takast omsyn til ved fastsetjing av skuleruta. Kommunestyret skal vedta den generelle forskrifta. Når forskrifta er vedteken, vil skuleruta for det enkelte skuleår verta fastsett administrativt innanfor dei rammene forskrifta gjev. Dette er i tråd med praksisen fleire kommunar har lagt seg
på etter innføringa av ny opplæringslov.

Ansvarsdeling mellom kommunestyret og administrasjonen

Ordninga inneber at dei politiske føringane for skuleruta vert fastsette gjennom forskrifta, medan administrasjonen v/rådmannen får ansvar for å fastsetja skuleruta for kvart skuleår innanfor dei vedtekne rammene. Dette vil gje ein meir effektiv prosess, samstundes som skuleruta framleis må utarbeidast i tråd med forskrifta og
gjeldande lovverk.

Kvifor innføra ei generell forskrift?

Ei generell forskrift om skulerute sikrar politisk styring av dei overordna prinsippa for skulestart, feriar, planleggingsdagar og andre rammer for skuleåret. Samstundes kan administrasjonen fastsetja dei konkrete datoane for kvart skuleår utan at saka må behandlast politisk årleg. Løysinga reduserer behovet for årlege politiske vedtak,
utan at det går ut over kommunestyret si styring av dei overordna rammene for skuleruta i Eidfjord kommune.

Høyring og vidare saksgang

• Forslaget til forskrift vert lagt ut på høyring i seks veker.
• Etter at høyringsfristen er ute, vil administrasjonen vurdera innkomne merknader og eventuelt justera forskrifta før endeleg forslag vert lagt fram for politisk behandling. 
• Etter gjennomført høyring vil saka verta lagd fram for kommunestyret 14.12.2026 for endeleg behandling.
• Når forskrifta er vedteken, skal ho kunngjerast på Lovdata og gjerast offentleg tilgjengeleg i samsvar med gjeldande regelverk. 

Heimel i opplæringslova