Prosjektet med det nye reinseanlegget i Sysendalen er no i sluttfasen. Bygget og dei tekniske anlegga skal vera ferdige i løpet av 2026.

Planen er at verifiseringsperioden skal vera gjennomført innan mars 2027, og at anlegget då er i ordinær drift.

Skal du i gang med byggjeaktivitet i Sysendalen i 2027? Les viktig informasjon frå kommunen om tilkoplingsstopp og nytt reinseanlegg. 

Arbeidet på tomta nærmar seg slutten

Arbeidet med det nye reinseanlegget held fram. Prosjektet har hatt utfordringar med å få på plass ny entreprenør for å fullføra grunnarbeida, men arbeidet går etter planen. Båsum Boring AS har fått oppdraget med å fullføra utløpsleidningen. Firmaet utfører òg restarbeid på tomta for Stoltz Entreprenør AS, som har ansvar for byggentreprisen.

Alle VA- og elkraftgrøfter mellom trafo, pumpestasjon og bygg er no ferdige. Store delar av tomta er fylte opp til rett nivå. Utløpsleidningen frå reinseanlegget til Bjoreio er nesten ferdig. Det som står att, er samankopling mellom to kummar i Brudalen.

Etter planen skal dei siste grøftene langs riksveg 7 og ferdigstillinga av Gommakvile pumpestasjon utførast i oktober. Gropa langs vegen vil verta fylt att dei næraste dagane. Tankane som skal koplast til pumpestasjonen, er no komne på plass.

Byggjearbeida følgjer framdriftsplanen

Byggjearbeida følgjer den overordna framdriftsplanen. Stoltz Entreprenør AS skal etter planen overlevera bygget til kommunen innan 1. januar 2027. No går arbeidet med innreiing og tekniske installasjonar føre seg. Byggentreprisen omfattar òg tilkopling av elektroanlegg for prosessen.

Utstyr og tekniske anlegg kjem på plass

Eliquo PMI, som har ansvar for prosessentreprisen, har kome langt med montering av utstyr og tankar i prosesshallen. Arbeidet følgjer framdriftsplanen. No pågår røyrlegging og montering av pumper og anna utstyr.

Anleggsteknisk overtaking er planlagd til 7. desember 2026. Etter dette startar testing og igangkøyring av anlegget. Verifiseringsperioden startar 1. februar 2027. Før denne datoen må heile Sysendalen vera kopla til det nye reinseanlegget.

Arbeid med pumpeleidning på Maurset

På Maurset går arbeidet med ny pumpeleidning frå dagens reinseanlegg til Rypebrotet fram etter planen. Granvin Maskinstasjon AS har fått oppdraget med å leggja om infrastrukturen som må endrast for at området skal kunna koplast til det nye reinseanlegget.

Mesteparten av leidningen er lagd i myr ved retningsstyrt boring. Dette gjer at inngrepa i terrenget vert mindre synlege enn ved vanleg grøftegraving. Grøfta bak landhandelen er ferdig, og no går arbeidet vidare på den siste strekninga mot Rypebrotet. Det skal òg borast under riksvegen for å føra pumpeleidningen fram til ein ny kum på andre sida av vegen.

Omkopling av heile Sysendalen

Det er laga ein plan for alle omkoplingane som må gjerast for å kopla heile Sysendalen til det nye reinseanlegget. Samarbeidet mellom entreprenørane, dei prosjekterande og Eidfjord kommune fungerer godt. Omkoplingane skal etter planen gjennomførast i januar 2027.

Bygget

Grunnarbeida er avslutta for vinteren, og entreprise bygg har komme godt i gang med å setja opp stålberinga for bygget i veke 50.

Vidare har holdekker vorte monterte i veke 51, og vert støypte fast siste arbeidsdag før prosjektet tek joleferie. Då er bygget klart for vidare montasje av brystningselement, fasade og takplater frå veke 2 etter nyttår.

Framdrift

Framdrifta vert framleis halden etter plan, takka vera effektiv prosjektering, og me har hatt vêret med oss i desember. Vidare plan avheng også av at me ikkje får stormar som hindrar kraning av element.

NB!

Det skal ikkje utførast arbeid på byggjeplassen i veke 52 eller 1, så byggjeplassen vert stengd av, og uvedkommande må ikkje ta seg inn på området.

Status Anlegg Vest AS

Som tidlegare informert, er Anlegg Vest AS (EG) under rekonstruksjon og prosjektet veit ikkje meir om status her enn at det går føre seg ein prosess. Så snart det er nye opplysningar i saka, vil det varslast på nettsida til kommunen.

Grunnarbeidet skal uansett ikkje hald fram før til våren, så vil utfallet frå rekonstruksjonen avgjerda om Anlegg Vest held fram arbeidet eller ikkje. Byggherre førebur seg på fleire moglege utfall, slik at framdrifta i prosjektet vert påverka i minst mogleg grad.

Vidare arbeid

Bygningsarbeidet vil halda fram gjennom vinteren, og etter planen skal dette bygget vera tett innan mai 2027. Då vil også entreprenøren Eliquo Malmberg koma til plassen, for å starta arbeidet med prosessutstyret som skal inn i det nye bygget.

Planlagd ferdigstilling av bygget er i november 2026, med etterfølgjande påkopling for verifikasjonstesting innan desember. Me skal då vera i tråd med fristen som Statsforvaltaren har sett for utsleppsløyvet.

Frå alle oss i prosjektet ynskjer me ei riktig god jol, og eit godt nytt år!

Presentasjon kommunestyremøtet 09.12.25 (PDF, 6 MB)

Ein svært viktig og gledeleg milepåle er nådd i prosjektet, då me den 18.11.2025 fekk igangsetjingsløyve (IG) frå Eidfjord kommune for bygg (EB). Vedlagt er eit illustrasjonsbilete som HLM arkitekt har laga for å visualisera reinseanlegget. Fasadar er haldne i ein mørk gråfarge med innslag av lysare grå felt som står fram som horisontale brotne liner. At volumet til bygget er delt opp i ein høgare og ein lågare del gjer at bygget verkar mindre ruvande. Den lågare delen er orientert mot riksvegen.

Stoltz Entreprenør AS startar denne veka med å støypa fundament, og frå veke 50/51 startar bygging av berande konstruksjonar i stål. Vidare skal det monterast holdekke for etasjeskilje, i veke 2 skal bygget kledast med isolerte sandwichelement, og deretter skal taket byggjast opp og tekkjast.

Det er kjent for kommunen at grunnentreprenør Anlegg Vest AS har store økonomiske problem, og dei har vorte innkalla til rettsmøte av Skatteetaten i byrjinga av desember. Hordaland tingrett har den 17.11.2025 opna offentleg forhandling om rekonstruksjon.

Byggherren har hatt jamleg dialog med entreprenøren om saka, og forholda påverkar førebels ikkje den totale framdrifta i prosjektet.

I Eidfjord kommunestyre 05.02.2024 vart reguleringsplan for Sysendalen reinseanlegg vedteke. Nytt reinseanlegg skal etter vedtaket plasserast på Gommakvilet, etter Liseth krysset på strekka mot Garen.

Med grunnlag i veksten i tal fritidsbustader i Sysendalen er eksisterande reinseanlegg i Sysendalen underdimensjonerte, derav har det etter tilsyn kommet krav frå Statsforvaltar om etablering av nytt reinseanlegg for avlaupsområde Sysendalen. 

Eidfjord kommune har siden tilsyn i 2021 arbeida med å sjå moglege løysingar på utfordringa, samt vore innom fleire plasseringar. Eidfjord kommunestyre vedtok 30.05.2022 at nytt reinseanlegg for Sysendalen skulle ligga på Gommakvilet, mellom Lisethkrysset og Garen. 

Administrasjonen har arbeida fram ein reguleringsplan for området som vart vedteke i Eidfjord kommunestyre 05.02.2024. Planmateriellet i sin heilskap ligg tilgjengeleg via arealplaner.no.